我番左黎啦,其實都有成個幾禮拜啦~

呢次Ukraine之旅,都真係幾特別,體驗到好多文化上既不同~

等我講下呢兩個幾月既情況啦~

6-7月,我就0係一個叫dreamland既campsite做野~

每個term會有大約60個小朋友,18日為一個term~

我係去到Ukraine先知,原來個term有成18日咁長!

香港果d camp通常都係幾日,18日真係超crazy!

campsite環境都唔錯,因為係專for有錢小朋友既summer camp~

d小朋友2-3個人一間房,仲要有電視,雪櫃架~

我既工作,campsite方面只係需要我用英文同d小朋友溝通~

所以,基本上係無咩實質野做,都真係幾悶下~

而且,得我一個intern,其他老師同小朋友都唔多講英文,成日講Russian~

起初搞到我真係好down,好想返香港~

好彩,有兩個AIESECers都入左黎做野~

有人陪我,心情都好好多,而且我亦都漸漸習慣左~

而且,我仲可以教下中文,原來教外國人中文係幾得意架~

所以,後來都做得幾開心~

小朋友方面,我覺得佢地真係好可愛呀~

佢地會好熱心咁教我Russian,教完我之後,每日又會考番我喎,好搞笑~

而且,佢地都主動同我講英文,有時即使佢地唔係好識講,都會好努力咁講~

我覺得佢地真係好乖,會好好把握學習既機會~

活動方面,果邊就唔同香港,比較少團體精神或者歷奇既遊戲玩~

佢地會有比較多興趣班,表演咁樣~

間唔中出去野餐,參觀咁啦~

夜晚,佢地就會去campsite裡面既disco跳舞~

佢地仲成日拉埋我去跳,好搞笑~

到左8月,我就join左另一個project,可以同其他interns一齊做野~

呢個project就係去唔同既campsite,做country presentation, learning circle等~

由於要去唔同city,所以我地都用左幾多時間0係交通上面,真係幾累下~

我地仲要2-3日就轉一次campsite,所以真係成日走黎走去~

尤其記得坐過一種超平火車,大約港幣10蚊,坐左成4個鐘~

果日下午坐,裡面無風扇無冷氣,我估裡面有成40度囉,勁辛苦!

0係campsite,每日大約工作兩三個鐘~

當我做country presentation時,原來當地人對中國文化係幾有興趣架~

問左好多有關中國既問題~

另外,佢地成日會叫我寫佢地既中文名~

有次直情好似新年寫揮春咁,排晒隊等我寫名,真係好搞笑~

我地既工作唔多,所以大部分時間都好悠閒,好似渡假咁~

大家成日都會去游水,曬太陽,飲下酒咁~

除左工作以外,旅行就當然唔少得啦~

我就去左三個比較出名既城市,Kiev, Lviv, Odessa~

Lviv係一個西部既城市,我地要由最東去到最西~

由於無晒直達火車,所以我地用左三十個鐘去Lviv,真係好難忘!

凌晨時份既火車站~

去到Lviv之後,我地再去一個郊外地方露營,準備慶祝節日Ivana Kupala~

 有成廿幾三十個AIESECers一齊去,真係好熱鬧~

如果無記錯,呢個節日以前係d女仔放花環落河,如果男仔對佢有意思,

就會拎起佢個花環~

依家就係女仔整個花環,將花環拋落河,沉既就今年會結婚,浮既就唔會~

我都拋花環呀,但係係浮既,所以我今年唔會結婚呀,哈哈~

另外,佢地仲會有d傳統歌舞,但可惜落雨無得睇~

之後,我地就去番city遊覽,Lviv由於以前被Poland統治過,

所以d建築物同其他歐洲國家比較似,幾靚架~

另一個city就係Kiev, Ukraine首都~

真係有幾多野睇,有大城市既感覺~

我尤其鐘意d church,因為真係好特別好靚~

不過,今次係我地幾個香港interns自由行,所以都出現唔少困難~

言語不通就係最大問題,基本問十個人,八個都唔識英文,好難問路~

有時真係問到好灰~

呢個係Kiev metro,我覺得係幾特別架~

因為個metro station真係好深,d電梯真係超長~

而且,佢地兩條線交滙既站,係會有各自各唔同既站名,好得意~

最後,就係Odessa啦,一個近黑海既city~

開頭都抱幾大期望架,但去到又好似唔係好多野睇~

可能Odessa可能主要都係for遊客游水,渡假果d啦~

不過無咩所謂啦,我鍾意近海既地方~

今次internship對於我黎講,真係一次幾好既體驗~

工作上,雖然唔可以話學到好多野,但亦有所得著~

之前有一段時間,做得唔係好開心,但依家睇番,

呢段時間係一種鍛鍊,可以令自己改進~

文化上,呢方面真係體驗到好多既不同~

尤其之前根本對Ukraine一無所知~

所以去到Ukraine之前,真係無諗過,可以有咁多不同之處~

呢方面既體驗或者得著,應該係最多既~

當地AIESECers呢,我覺得我真係好彩,遇到一班好既AIESECers~

佢地全部都好好人好nice,成日都好照顧我地~

我地每次去其他地方,佢地都會接送~

我地去旅行,佢地又會幫我地聯絡其他AIESECers接待~

真係成日都麻煩到佢地,搞到我都唔好意思~

所以,如果佢地黎香港,我一定會好好接待佢地~

去完intership,覺得AIESEC真係一個big family!

We are in a big family!

今日間hostel有wifi,終於可以update一下啦~

呢幾日去左幾個地方,Munich,Fussen,Ausburg,Rothernburg,Frankfurt~

呢條路線叫浪漫之路,沿途風景都幾靚,有好特色小屋~

旅程都算順利,無咩大問題,係交通較為麻煩同貴~

都係upload d相俾大家睇下啦~

以下就係新天鵝堡啦,真係好靚呀!

好似童話裡面既城堡咁~

不過,山上既城堡真係好凍,簡直係寒氣迫人呀~

途中遇到香港人,即刻叫佢幫我影番張相~

之後,竟然0係hostel再遇到佢地,佢地都幾好人架~

去到德國,自然會食香腸啦

上面既curry腸我覺得幾好味~

之後,去左Rothernburg,係一個古舊既小鎮~

之後,去左參觀criminal  museum,都幾特別~

入面展示左好多有關刑罰既野,原來有d刑罰同中國都幾似架~

好似車裂,五馬分屍,沉豬籠等等~

呢個幾搞笑,係俾d多野講既婦女戴既面具,係一種懲罰啦~

估唔到,原來外國都有長舌婦呢回事架,哈哈~

鎮內有好多手工藝品,好多我都想買,但要慳錢呢~

呢度就係teddybear land啦,有好多teddybear,郁下郁下咁,好得意架~

依家我0係hostel個cafe上緊網~

同時,d人就係度睇歐洲國家盃,都幾熱鬧~

暫時黎講,我覺得呢次旅程都幾開心~

之後,我都會自由行,因為體驗既野真係比較多~

途中遇到d女仔,佢地都自遊行兩三個月~

我都好想好似佢地咁,去到多d地方~

之後,我一定要儲多d錢去旅行呀!

聽日開始,我就會join一個星期tour~

去荷蘭,比利時,法國,盧森堡,都幾趕下~

不過,由於無咁多時間plan同覺得安全d,所以join tour~

叫做去d國家睇下先啦,遲下有機會再深入了解,哈哈~

下星期再update啦~

由於visa同機票既問題,我可能唔去烏克蘭啦~

情況有小小複雜,係度我唔詳細講啦~

不過,我就真係俾個manager激死

依家都唔知點處理啦,唉......

由於我唔想浪費左我張機票,下星期一我會出發去德國~

大約去兩個星期啦,好多野都仲plan緊,因為時間實在太趕啦~

今次係我第一次自己去旅行,仲要去歐洲,心情難免有d緊張~

不過,我諗我ok既,萬事小心就係啦~

另外,Karry同Phoby之前同我farewell兼預祝生日~

好有心呀,真係好多謝你地呀~

不過,攪笑既係我依家都唔知仲去唔去烏克蘭啦~

唉......visa真係一樣好麻煩既野~

之前幫d interns搞visa煩,估唔到依家自己apply visa都係咁煩~

激死我啦!!!